Dagsaktuelle
utfordringar for Norge
og råderetten over ressursane.
Tromsø Nei til EU sin konferanse laurdag 13. april 2002.
Konferansen
var open og annonsert i pressa og gjennom oppslag. Den blei halden
på studenthuset
DRIV. Det møtte i alt 25 personar på konferansen, som
gjekk frå kl 1030 til
1415. Konferansen
blei opna av Anna Margrethe Flåm, leiar i Tromsø Nei
til EU. Møteleiar var Torstein Engelschøn
Kva
skjer på Island?
Einar
Eythorsson, Norsk Institutt for by- og regionforskning, avd. Alta,
og islandsk statsborgar,
heldt den første innleiinga, med tema "Kva skjer på
Island?". Norsk presse har i den seinare tida prøvd
å skape inntrykk av at Island var på veg til å
søke medlemskap i EU, og det blei vist til meiningsmålingar
som tyder på eit stort ja-fleirtal.
Eythorsson la fram fordelingane på ei rekkje meiningsmålingar,
og over tid viser dei lite endring. Det ser ut til å vere
stabilt, men knapt feilrtal på Island som ønskjer
EU-medlemskap (52%). Det er berre 25% som sier nei til medlemskap,
mens 23% er usikre. Utanriksministeren, Asgrimsson frå det
islandske Senterpartiet, er for EU, mens statsministeren, Oddson
frå det islandske Høgre, er EU-motstandar.
Kva
kan vere grunnen til den EU-positive stemninga på Island?
Eythorsson nemnde først systemet med omsettelege kvotar
i fisket dette er eit system som er tilpassa EU, og det har
vore i bruk på Island sidan 1990. For det andre har omsettinga
av fiskekvotar ført til at store ressursar er samla på
nokre få rederi. Desse har også investert i havfiskeflåten
i EU-land, og har såleis ikkje så stor frykt for ein
EU-flåte som dei sjølve eig delar av. For det tredje
er fisket på Island integrert slik at dei som eig båtane
også er eksportørar og dermed meir marknadsorienterte
enn t.d. norske fiskarar.
Eit
fjerde argument er at Island er litt likt landa i Aust-Europa
som søkjer medlemskap også på Island er det
ein utbreidd mistillit til statlege institusjonar. Om det ikkje
er korrupsjon, så er det små forhold og svakt personvern;
i tillegg er ikkje arbeidarvernlovgivinga særleg godt utvikla
- mange i fagrørsla vil hevde at EU har eit betre regeleverk
enn Island. Eit femte argument er at islendingar er trøytte
av ei økonomisk berg-og-dalbane, skyhøgt rentenivå
(18-20%) og ser på Euroen som ein stabiliserande faktor.
På den andre sida vil EU-motstandarar hevde at arbeidsløysa
er mykje lågare og den økonomiske veksten mykje større
på Island enn i Euro-sonen.
Lokal og nasjonal ressursmakt i dag: Viktige utfordringar.
Ragnar
Nilsen, IPL, Universitetet i Tromsø, som arbeider med eit
delprosjekt under den norske Makt- og demokratiutredninga, heldt
ei innleiing om lokal og nasjonal ressursmakt i dag, med særleg
fokus på fiskeressursar og på retten til vasskrafta
i Norge. Nilsen framheldt at Norge faktisk er eit "anderledesland"
ettersom så store delar av våre inntekter er knytt
til utvinning og hausting av naturressursar. Den økonomiske
verdien av vasskraftressursane er i liten grad kjent, ettersom
det er liten omsetning av kraftverk. Økonomiske
berekningar tilseier imidlertid at verdien er på linje med
oljesektoren med den forskjellen at vasskrafta i prinsippet
er evigvarande.
Vasskrafta
er i høg grad forvalta som ein fellesressurs. Når
den har vore overlatt til private selskap, er det med ein heimfallsrett
at retten og verka vederlagsfritt skal tilfalle den norske stat
etter eit visst antal år. Staten sin kontroll med vasskrafta
har vore eit sentralt element i bygginga av den moderne norske
staten etterkvart velferdsstaten.
Vasskraft
og energi har vore tenkt som ei forsynings- og fordelingsoppgåve,
ikkje som ei vare for fri omsetting. Ser vi på EU, så
kan idéen bak EU sin økonomiske politikk ifølgje
Ottar Brox samanfattast i ordet "eit privatiseringsprosjekt".
I den grad EØS-avtalen er i strid med heimfallsretten
og slike signal er allereie kome så vil ei nærare
tilknyting til EU føre til ei privatisering av kraftressursane.
Rådet frå Ragnar Nilsen var dermed at kommunar og
fylke ikkje bør selje sine kraftverk eller eigedelar i
slike.
Eksemplet olja: Kva betyr råderetten over den?
Håkon
Helle, advokat til Høgsterett, busett i Stavanger, heldt
så ei innleiing om råderett over norske petroleumsressursar.
Han viste til at oppfatninga om Norge som eit svært rikt
land er av ny dato ved mange høve hadde det vore debattar
om det i det heile burde bu folk i eit land med så karrig
natur og dårlege forhold for matproduksjon på land.
Det spesielle ved Norge er ikkje at landet er rikt på naturressursar,
men at vi har institusjonar som sikrar at verdiane som blir skapt
frå ressursgrunnlaget kjem heile folket til gode den sterke
vekta det i Norge gjennom historia har vore på allemannsretten.
Dette har også ført til at vi i Norge ser på
Staten som folkets eigedom, og ikkje som ein institusjon som utnyttar
folket.
I
1970 blei det påvist drivverdige forekomstar av olje på
norsk sokkel. Men før dette hadde den norske staten knesett
prisnippet om statleg eigendomsrett til eventuelle oljeressursar.
I samsvar med Genevekonvensjonen frå 1958 om statars rett
til eigen sokkel blei Petroleumslova vedtatt allereie i 1963.
Og her framgår det av §2 at: "Retten tilligger staten
"
Har så politikken vore vellukka? Lenge gjekk offentlege
midlar med til investeringar i installasjonar, først på
1990-talet er det blitt ein haustingsfase med statlege inntekter.
Det
er brei semje om at politikken, basert på ei hard skattlegging
av oljeselskapa sine inntekter (78%) pluss roylaty av produksjonen
pluss andre skatteordningar, har vore vellukka. Også dei
private storselskapa har innrømt dette. Petroleumslova,
som held fram at inntekter frå oljeverksemda skal kome heile
det norske samfunnet til gode velferds- og distriktsomsyn m.m.
er klart i strid med EØS-reglane, der ein ser oljesektoren
som ein rein økonomisk konkurransesektor. Dette kjem klart
til uttrykk i EØS sitt forhold til Statoil som etter
EØS ikkje skal ta andre omsyn enn å tene pengar.
Ei
aggressiv linje frå EU har særleg kome til uttrykk
når det gjeld omsetninga av gass. Norge har måtta
nedlegge gassforhandlingsutvalet, og det er blitt arbeidd med
krav om erstatning for dei skader som fråver av konkurranse
(langsiktige gassavtalar) kan ha påført private selskap.
Havrettstraktaten: Kan arbeidet med den vise veg for ein nasjons
mulegheiter for å verne verdsressursar?
Ivan
Kristoffersen, tidlegare Nordlys-redaktør og statssekretær
i fiskeridepartementet held siste innleiing på konferansen.
Han tok for seg retten til fiskeressursar som kom som resultat
av Havrettstraktaten som blei framforhandla i 1977, med Jens Evensen
som viktig pådrivar. Frå ei sjøgrense på
12 mil fekk Norge radikalt utvida sin råderett med innføringa
av 200 mils økonomisk sone. Forvaltninga av den økonomiske
sonen skulle skje med utgangspunkt i langsiktig ressursvern, med
eit samarbeid med andre nasjonar når det galt vandrande
bestandar, og med samarbeid med andre statar som historisk hadde
hatt fiske i sonen.
Ivan
Kristoffersen meinte at EU sitt fiskeripolitiske regime og regelverk
for utvinning av ressursar, rørledningar osv. var i strid
med havrettstraktaten sin klare tildeling av rettar til nasjonalstatar.
For Havrettstraktaten slo også fast kyststaten sine rettar
til ressursar på havbotnen, under havbotnen, og utvinning
av desse. Også her ville havretten sine prinsipp vere i
konflikt med EU sitt syn på den frie konkurranse og omsynet
til private interesser, og Kristoffersen undra seg over at dette
forholdet ikkje hadde blitt gjort til eit tema under forhandlingar
med EU.
I
etterkant av innlegga var det opna for spørsmål og
debatt, og mange av deltakarane på konferansen hadde spørsmål
og innlegg, Anna Margrethe Flåm oppsummerte konferansen
som vellukka og viktig, samtidig som ho også peika på
det beklagelege i at media ikkje viste interesse for eit arrangement,
viktig både for aktuell samfunnsinformasjon og for politisk
meiningsdanning.