Tromsø, 22.06.2004
Nei-sida sitt alternativ
Av Nils Aarsæther og Eli Berg, Troms
Nei til EU
Geir Ove Ystmark, generalsekretær
i den NHO-finansierte organsiasjonen "Kysten inn i EU" etterlyser
Nei-sidas alternativ når det gjelder norsk fiskeeksport. Generelt
kan vi opplyse at Nei-sida er klar over at både fiskeindustrien
og havbruksnæringa kan ha fordelar av EØS-avtala, ettersom den
inneber reduserte tollsatsar.
Når Nei til EU er imot norsk EU-medlemskap
og vil erstatte EØS-avtalen med ein balansert frihandelsavtale
med EU, er det etter ei heilskapleg vurdering. Vi meiner EØS-avtala
går altfor langt i underlegge Norge EU sitt regelverk på ei rekke
samfunnsområde. Dette regelverket hindrar for eksempel i dag norske
folkevalgte organ i å føre ein treffsikker regionalpolitikk. Dersom
bortfall av EØS-avtala vil føre til auka vanskar for fiskeindustrien
og havbruksnæringa, må dette sjølsagt bli fullt ut kompensert
av den norske stat.
Meiningane om EØS og om fiskeri-
og havbrukspolitikken er delte på Nei-sida. Nei til EU er ikkje
eit politisk parti, men ein organisasjon som samlar folk frå ei
rekkje ulike yrker og politiske retningar om eit enkelt felles
mål: Det skal vere opp til det norske folket å bestemme korleis
landet skal styrast. Med eit medlemskap i EU mister vi store delar
av denne retten. At vi ved eit medlemskap vil få litt innflytelse
på EU (kanskje 2 % av stemmane) ser vi ikkje som noko godt alternativ.
Den nye EU-grunnlova slår fast
at fiskeripolitikken skal vere eit felles ansvar på EU-nivå. Kyststatane
må derfor underordne seg Bryssel i fiskeripolitikken. Kva dette
betyr for økonomi, forvaltning og ressursvern langs kysten skjønner
dei fleste, og Nei til EU i Troms får stadig fleire betalande
medlemmer. På den andre sida konstaterer vi at Ystmark og Rindestu
fortsetter sin kampanje for å få 2 % innflytelse i Unionen - iallfall
så lenge NHO-pengane strekk til.