Sørreisa,
14. juni 2010
EU/EØS
og vanlege folk
Av
Olav Flaate, Sørreisa Nei til EU
Målsetjinga for EU
er å få den mest kunnskapsbaserte konkurransedyktige økonomien i
verda. For å oppnå dette var og er fri flyt av varer, tenester,
kapital og arbeidskraft i EU/EØS-området den magiske løysinga. Denne
frie flyten skal gå fort og mest mogeleg uhindra. Difor er passkontroll
og andre kontrollar inne i EU området minimalisert. "Tid er pengar
filosofien" er viktigare enn å sikre trygge grensepasseringar.
Dette er heller ikkje
å undrast over når me veit at ERT - The Round Table of European
Industrialists - ei samanslutning av leiarar av multinasjonale og
EU- nasjonale storkonsern har utforma strategien for den frie konkurransen
og den frie/uhindra flyten av arbeidskraft og varer og tenester.
I denne samanhangen
virkar det som det og vart fri flyt av kriminelle personar og dei
mogelege terrorristane som EU no vil få tak i gjennom eit overvakingsprogram
nedfelt i Datalagringsdirektivet. Denne overvakinga skal gjelde
oss alle om me er kriminelle eller lovlydige borgarar! Personvernet
kjem i siste rekkje berre EU - businessen får fritt spelerom.
Tilsvarande negativ
interesse har EU ovanfor offentlege velferdsordningar som sjukelønsordningar,
arbeidsløysetrygd, alderspensjon, uførepensjon osv. som skal syta
for økonomisk tryggleik når den einskilde av ulike årsaker er ute
av arbeidslivet.
EU vil privatisere så
mykje som mogeleg av offentleg tenesteproduksjon, noko som forståeleg
nok skaper stor usikkerheit blant den jamne mann og kvinne i EU/EØS-
området. Dette EU-systemet tufta på fri konkurranse, fri flyt og
maksimal profitt for industriherrane og aksjonærane vaklar no i
samanføyingane. Dette systemet,
som både Gro Harlem Brundland og Thorbjørn Jagland hevda at Noreg
ikkje ville klara seg utan å vera medlem av, har
store problem.
Sentralbanken i EU støtta
næringslivet i EU-sona med store pengesummar etter finanskrisa som
starta i USA. Men no syner det seg at finanskrisa ikkje er over
i EU og verdsbanken og det internasjonale pengefondet kjem inn på
arenaen for å "redde" statsøkonomien, som skal trygge offentleg
sektor med å finansiere skular, sjukehus, vegar, alderspensjonar
osv.
Hellas er vel det landet
som er verst stilla, medan Spania, Portugal, Italia og England er
andre land i det "gode selskapet" som har problem med budsjettunderskot.
Det kan synast som om den store draumen om eurosamarbeidet er i
faresonen. Det er heller ikkje rart når så mange ulike land med
så ulik økonomi skal pressast til å føra den same økonomiske politikken
i landa sine.
Samstundes skal marknadskapitalismen
"styre utviklinga", ei utvikling som skjerpar den globale konkuransen
og tar mindre omsyn til den jamne mann og kone sitt ve og vel.
Den globale egoismen
som utløyste Enron-skandalen i USA og heldt fram med husspekulasjonar
og andre tvilsame foretak, har fått den norske finansmannen Øystein
Stray Spetalen til å sjå ljoset når han i ein artikkel i avisa Dagens
Næringsliv ytrar seg om det globale finansielle spelet som går føre
seg og peikar på eit konglomerat av EU, IMF og politikarar som er
fletta saman i eit samansurium med bankvesenet og det finansielle
systemet i Europa og vernar om kvarandre.
Når det gjeld Noreg
sitt høve til EU seier Spetalen: "Heldigvis, og jeg sier heldigvis,
er vi ikke med i EU. Og heldigvis kommer vi ikke med der noen gang".
|