Tromsø,
27.02.2002
EU
vil endre barnematen - også i Norge.
Av Nils Aarsæther og Eli Berg,
Troms Nei til EU
Regjeringa Bondevik
vil innføre EU sitt direktiv som opnar for nye tilsettingsstoff
i barnematen som blir selt i norske butikkar. I staden for eit
klart og greit veto - beklagar, dette vil vi ikkje - legg vi oss
igjen flat for Brüssel.
Dersom Norge hadde vore medlem av EU, kunne vi stemt i mot, og
bli nedstemt. Utanfor EU kan vi legge ned veto mot direktiv som
etter vår oppfatning er helseskadelege. Såpass bør
vi forvente av våre folkevalde. Eit norsk veto hadde også
blitt lagd merke til innetter i EU, og kanskje ført til
at dei som er blitt nedstemt i denne saka fekk nye argument.
Men barnemat-saka reiser eit meir grunnleggande spørsmål:
Kven er EU eigentleg til for? Seier ikkje barnemat-direktivet
nokså mykje om kva slags krefter det er som har EU på
si side? Det er jo knapt tenkeleg at det er dei politiske partia
i EU-parlamentet som har krevd nye tilsettingsstoff. Det er vel
heller ikkje småbarnsforeldra som har samla seg om eit krav
om å opne for overdosar av vitaminar og mineralar?
Det skulle sanneleg
ikkje forundre oss om at det var kapitalinteressene i matvareindustrien
som ville ha denne endringa, i samarbeid med nokre livsfjerne
og overivrige folkehelsebyråkratar. Vi bør ønske
oss sjølv til lykke med at vi ikkje er med i ei statsdanning
som lukkar seg til mot folket og overlet til kapitalen og byråkratiet
å bestemme!