Sørreisa,
2. november 2007
EU - den mest konkurransedyktige
økonomien i verda !
Av Olav Flaate, Sørreisa Nei
til EU
EU er stadig på jakt etter nye marknader
for den ekspansive handelspolitikken sin. Målsetjinga om å få den
mest konkurransedyktige økonomien i verda er både grenselaus, skrupellaus
og kynisk. Det går no føre seg forhandlingar mellom EU og dei afrikanske
landa om ein handelsavtale (EPA).
Eit vilkår EU set for å få til ein
avtale er at dei afrikanske landa skal ta bort tollen på 80% av
varer frå EU. Dette vil føre til ein dramatisk reduksjon i offentlege
inntekter for desse landa. I Zambia tilsvarer dette like mykje pengar
som vert brukt til å få bukt med aids!
I tidlegare frihandelsavtale mellom
afrikanske land og EU har sterkt subsidierte EU-varer strøymd inn
over dei afrikanske landa på ein slik måte at mange bønder, på dette
ressursrike kontinentet, ikkje har kunna konkurrera på pris med
EU-landa ! Resultatet er blitt at mange afrikanske bønder har slutta
med matvareproduksjon og jordbruk. Kven seier at kolonialiseringa
av afrikanske land er slutt?
I tillegg til at EU tvinger afrikanske
land til å redusere tollsatsar på varer frå EU, krev både det Internasjonale
Valutafondet ( IMF ) og Verdsbanken at dei fattige landa i Afrika
skal redusere dei offentlege utgifene dei har til skular, vegar,
helsestell osv. og finne fram til private løysingar. Dette er vilkåret,
dette er kravet for at desse landa skal få lån og tilskot til å
utvikle ein best mogeleg infrastruktur for befolkninga der.
Korleis ville det ha vore i Noreg
etter den 2. Verdskrigen dersom ikkje ein sterk offentleg økonomi
hadde støtt opp om gjenoppbygging og utvikling av Nord-Noreg og
grisgrendte strok ellers i landet? Med slike gode erfaringar frå
eige land må sjølvsagt dei offentlege budsjetta til fellesgodene
for folket i afrikanske land auke istadenfor å minke berre for å
stimulere profitthungeren til europeiske og multinasjonale konsern.
Ap har eit slagord som heiter "Alle
skal med". SV har hatt eit slagord som heiter "Del godene". Det
er vel sjølvsagt at desse slagorda gjeld både nasjonalt og globalt
i den globaliserte verda me lever i.
Gjennom EØS-avtalen er Noreg indirekte
med på ein handelsokkupasjon av land som treng økonomisk hjelp både
til utdaning, demokratibygging, ressursutnytting - og ikkje minst
til å skape stoltheit og sjølvkjensle blant den jamne mann og kvinne
i desse landa. Den rike delen av verda - der Noreg er sjølvskreven
- må gi desse landa hjelp til sjølvhjelp, slik at dei kan utvikle
sitt eige næringsliv - industri og jordbruk.
Når me veit at EØS-regelverket, som
Noreg er bunden opp av gjennom EØS avtalen - heller ikkje tar omsyn
til distriktspolitiske tiltak for å fremje vekst og utvikling i
vårt eige land, er det berre ein ting å gjera; seie opp EØS-avtalen!
Noreg gjer sikkert mykje for å redusere
svolt og fattigdom rundt om i verda. Men som ein suveren nasjon
frikopla dominansen frå EU, kan verkeleg landet vårt bli eit lysande
føredøme for andre land i verda i kampen mot ein stadig meir kynisk
kapitalisme.
|