Sørreisa,
23. november 2008
Den arrogante Jens
Stoltenberg
Av Olav Flaate, Sørreisa Nei til EU
Det finnest mange arrogante menneskje
som undervurderer og latterlegjer standpunkt andre måtte ha. Dette
fører skjeldan til ein konstruktiv dialog eller positive prosessar
vidare. Jens Stoltenberg godtar EU sitt tenestedirektiv trass i
ein massiv motstand i store delar av fagrørsla , blant mange AP
velgjarar i tillegg til samarbeidspartia SP og SV i den raudgrøne
regjeringa. Arrogansen kan berre samanliknast med Gro Harlem Brundland
som i si tid hevda at heimfallsretten til den norske vasskrafta
ikkje skulle vera noko EØS tema. Mange veit at dette ikkje var sant.
LO sette opp fire vilkår for å godta
tenestedirektivet : 1) sikring av tiltak mot sosial dumping. 2)
allmenngjering av tariffavtalar. 3)sikre den norske arbeidsretten
si suverene stilling. 4) sikring av offentlege tenester. No har
Jens Stoltenberg gitt garantiar til LO leiar Roar Flåthen om at
dei fire vilkåra er sikra. Dermed har LO godtatt tenestedirektivet.
Mange fagorganiserte både med og utan tilknyting til AP har protestert
på denne avgjerda. Garantiar som skulle sikre dei fire vilkåra LO
sette opp er umogeleg med ein dynamisk EØS avtale som det heile
kviler på.
Tenestedirektivet i seg sjølv vil
føre til fri flyt av tenesteoperatørar og tenesteytarar i heile
EU – området. Til dømes kan eit polsk reingjeringsfirma som er godkjend
i Polen fritt kunna etablera seg i Noreg – med polske løns – og
arbeidsvilkår ! Tenestedirektivet gjer det og ulovleg å stilla nasjonale
krav til utanlandske firma. Dei offentlege tenestene innan vassforsyning/avløp,
energiforsyning og utdaning er ikkje sikra for all framtid som offentlege
tenester med eit tenestedirektiv. Det er heller ikkje helsetenestene.
Den dynamiske EØS – avtalen kan ikkje
gi nokon garanti. Den frie flyten av varer , arbeidskraft, kapital
og tenester er ein stor fare for det velferdssamfunnet som Noreg
har bygt opp etter den 2. Verdskrigen med eit godt system for arbeids
og lønsvilkår med tariff – festa ferie og regulert arbeidstid,og
eit godt trygdesystem , offentlege skular og helsevesen. Difor er
det viktig å ha meir kontroll med økonomisk aktivitet for å sikre
det samfunnssystemet, som folk frå andre delar av verda misunner
oss og vil kopiere. Ein sterk offentleg sektor, der politikarar
tenkjer langsiktig og set mennesket i sentrum, vil vera grunnpillaren
for solidaritet,fellesskap og miljø – istadenfor egoisme og grådighheit.
Finanskrisa skaper i dag store problem
for vanlege folk mange stader i verda – i vesle Noreg og, men mest
i dei fattige landa – dei som har minst frå før. Fri flyt av kapital,
varer og tenester utan statleg/offentleg kontroll, førte i fyrste
omgang til stor opphoping av kapital hos multinajonale konsern og
leiarar med skyhøge honorar og fallsskjermar. Marknadskreftene rådde
– fri flyt rådde.
I dag er det mange som tar til orde
for meir statleg og offentleg kontroll med den økonomiske aktiviteten
rundt om i verda. Jens Stoltenberg derimot vil ha meir fri flyt,
meir av ting som førte til den økonomiske tilbakegangen me opplever
i dag. Det kan ikkje vera rett medisin. Noreg må setje ned veto
mot tenestedirektivet. Den økonomiske aktiviteten må ikkje få lov
til å væra eit trugsmål mot demokratiet. Me kjenner til land som
ikkje har det. Vil me ha det slik ?
|