Sørreisa,
3. mai 2010
Datalagringsdirektivet - eit trugsmål
mot personvernet og demokratiet
Av Olav Flaate, Sørreisa Nei til EU
Den
15. mars 2006 vedtok EU datalagringsdirektivet. Som EØS-medlem må
Noreg og implementere dette direktivet i det norske lovverket. Men
etter EØS sitt lovverk kan Noreg reservere seg og dermed nekte å
ha det som gjeldande norsk lov.
Kvifor
er det så viktig å reservere seg/avvise dette direktivet? Direktivet
krev at internettselskap og teleselskap skal langtidslagre opplysningar
om kven som snakkar med kven på fasttelefon, mobiltelefon og IP-telefon.
Dei skal og registrere kor lenge samtalen varer, kvar samtalepartnarane
er, og når samtalen skjer. Direktivet set vidare krav om å lagre
kven som får og sender e-post til kven og kva tid dei er kopla opp
til internett.
Det
framtidssamfunnet som forfattaren George Orwell skildrar i romanen
"1984" frå 1949, der styresmaktene "STOREBROR" - alltid ser deg,
synest å koma oss skræmande nært inn på livet. George Orwell lar
tv - apparatet vera to - vegs informerande. Folk ser tv-programma
sine på vanleg måte medan og tv-apparatet registrerer alt som går
føre seg innan bustaden til den einskilde, som så vert registrert
av dei styrande.
Når
det Norske Arbeidarpartiet med Jens Stoltenberg og Helga Pedersen
så sterkt går inn for dette direktivet, er det urovekkjande. AP
- det einaste partiet som synest å gå inn for direktivet - snur
alle politiske og demokratiske spelereglar på hovudet. Det er folket
som skal kontrollere politikarane/dei folkevalde og ikkje omvendt!Med
eit slikt direktiv og under påskot om å kjempe mot ulike former
for terrorverksemd, med ei stadig oppbygging av eit sterkt politi,
er ikkje vegen lang frå demokrati til diktatur.
Datadirektivet
reiser skræmande perspektiv på eit framtidssamfunn der både personvern
og demokratiet kan koma i fare. Alle dei norske politiske ungdomspartia
går mot dette direktivet. Ungdomen er framtida. Styresmaktene i
dette landet har både eit moralsk ansvar og ei fundamental plikt
til å lytte til fråsegnene frå ungdomen.
Med
så mange opplysningar som skal samlast inn om den einskilde i kraft
av datalagringsdirektivet, kan uvedkomande gjera uboteleg skade
når dei misbruker dei registrerte opplysningar til eigne føremål.
Me veit kor nedverdigande det har vore for einskildmenneske som
har opplevd at helseopplyningar er komne i urette hender.
I slike
tilfelle kjem det berre nokre platte årsakingar frå dei ansvarshavande
i etterkant. Men SKADEN for den det gjeld blir værande. Og stor
skade opplever og dei som vert fråstjålne identiteten sin fordi
det allereie er for mange registrerte personopplysningar om den
einskilde borgar i dette landet.
Det
nærmar seg 1. mai, den internasjonale demonstrasjonsdagen for arbeidarar.
Forutan å kjempe for gode arbeidsvilkår som fremjer arbeidsglede,
kreativitet og fellesskap på alle arbeidsplassar, kan det vera ein
tanke at 1. mai dagen i Noreg i 2010 og vert ein demonstrasjonsdag
mot datalagringsdirektivet og for demokratiet og personvernet. Mister
me desse verdiane, må me skamme oss ovanfor dei komande generasjonane!
|