Sørreisa,
20. januar 2009
Blir det ny EU-kamp i 2009?
Lenvik og Sørreisa Nei til
EU v/Olav Flaate
Onsdag den 28 januar 2009 arrangerer
Lenvik og Sørreisa Nei til EU eit felles ope møte i Sørreisa kulturhus
med temaet ”Blir det ny EU – kamp i 2009”? Island er bankerott,
finanskrise set sitt stempel på arbeidsliv og politisk liv i den
såkalla ”global village”, i heile verda.
Fri flyt av varer, arbeidskraft,
tenester og kapital, med minst mogeleg politisk kontroll, førte
verda uti ei krise me må heilt attende til 1929 for å finne noko
liknande til.
Det er stortingsval i 2009 og Erna
Solberg, dei borgarlege partia sin statsministerkandidat, ivrar
for EU–søknad og EU-medlemskap. Det same gjer Grete Berget, generalsekretær
i Ja til EU-rørsla. Thorbjørn Jagland, noverande stortingspresident,
har vel fått så mange smekkar på fingrane at han ikkje finn tida
mogen enno.
Heming Olaussen vil i tilknyting
til temaet koma inn på svært kontroversielle EU–direktiv som til
dømes: Tenestedirektivet, Postdirektivet, Datalagringsdirektivet
– kva dreier det seg om? Kva vert konsekvensane ved å innlemme desse
i det norske lovverket? EØS avtalen, så lovprisa av både Ja til
EU og NHO, produserer kontinuerleg direktiv som får djuptgripande
verknader for norsk samfunnsliv. Er det noko alternativ til EØS–avtalen?
Offentleg sektor vert systematisk
bygd ned i EU-landa. Den sektoren som er ein garanti for infrastruktur
for fellesskapet med skular, sjukehus og samferdslesektor. Mange
veit korleis det er i USA. Vil me ha det slik og? Det vert ein spanande
kveld med mykje informasjon og høve til spørsmål. Det vert og bevertning,
så ta med deg naboen og møt opp på kulturhuset i Sørreisa 28. august
2009.
|